-Leishangthem Roshan Meetei
Ingaa gi angaoba nongju na sit naanna chaamthokhraba atiyaa amakpa amata leitana sengli, nasai nungthil nong khara chukhibagi oiramalle. Makoi phana koiraba thaanil gi thaajana amamba ahingbu inglaba mangaal na sumli. Cheiraktuda kaojeng-harou na naosum seisak tamli. Inglaba maalang na hakchaangda yeibada thotna nouraba gulaap ki leinaana hakchaangda naanduna sanabagum phaoe. Atiyaada thawaan singna kuphet kaphet ngaanbadu ooraga houkhraba akaobagi mamlaba looraba irolnungda chatkhrashanu khalluraba, kaoge khanbada henna henna meichaak haplariba kaongamdraba mapok simagi oina haktuna thamoi nungda leihouragadaba nungsi warido mitlugi ningamdabagi piraangga loinana ningsinglak-e, chingda satchabi, chinggi leirang Worinyo na.
‘Angaangba gulaap na eigidi khwaidagi paamjaba leirangni, maramdi angaangba gulaap na eikhoi anigi nungsibagi khudamni, chingmee-tamee anigi nungsinabagi lipun oigadouribani.' (Khanghoudana Tarakhiba Lamngaanbagi Khonjelda)
‘Ho etaa leirang gulaap karigino eigi thamoina maabu kaoge ngamdriba, nangdi eikhoi anigi nungsi khudam natra karigino eibu wahalliba.‘(kaptuna)
Worinyo gi matou ubada nongdol thaaja masu leichilakta lottuna tengthari, kaojeng-harou su khongdre, makhoisu maagi matoubu yengamdre. Makhoi loina nunggum kallaba nungsibabu sanapotkum khanba chamjarabi thamoibu thugairiba Lamngaanba gi mayokta leptuna Worinyo gi awabada saruk yari.
Sumangda pheidom naina thaariba gulaap panbisingda yengduna leiringei-
‘Worinyo mapoksida karigumba nang-ei panthung youba ngamloidaba oiragadi eikhoi ani siminakhibada eigi chingnaba leite. Nanggidi leibara?‘(Worinyo gi mangda Lamngaanba thoklaktuna nungsina hanglak-e)
‘Eigi chingnaba leitiye nungsiba.‘
Worinyo momon nokna khumjarak-e. Adubu wakhal da lakhiba Lamngaanba di leiramdre, gulaap panbi sing adu khakta leirammi. Ningba kairaba Worinyo ningsingba mana otpiriba sintharakhi ningamda piraang looraba maagi mitludagi thaajagi mangaal na yeibada laairembi kanana tengthabagum hikna-hikna nangthajari, ningamda meisha eeroinana.
Tabithaa ga Horeiphi ga eemungdagi thoraktuna, Worinyo gi manakta phamlaga Tabithaa na hairaklammi.
‘Worin laklo tumlurasi thengle.‘
Khanghoudana taarakhiba mabu koubagi khonjelduda ekhang-khangna mamittagi piraang teithoktuna, tusonaraba sitharaba khonjelga loinana Worinyona khumlak-e
‘Tabithaa, Horeiphi nakhoi ani tumluro ei ngaihak phamhoukhige.‘
Asaobana thuhatlabi Horeiphi na asaoba khonphamga loinana hairak-e
‘Eta karino nanggi natouse, chaksu chao yade tumbasu tumde, karino nangna tourisibu?‘
‘Senabinaba leitraba leikolda saatliba leiraang aduna kayaam kuina leisaat tamgani. Eigi thawaai di sikhrabani, hakchaang simatani leihouriba, leihouriba masu maangkhrashanu.’ - Taniklabi khonjelda Worinyo khumlak-e
‘Madugi meephattado, maagi lounam langda thurubana nangdi ngasidi kaya waana lelliba aduga maana atoppa kanagi nungsibada taoduna leiri, maadi mee natte saane saa.‘
Horeiphi na phingna hairak-e, waahei sing asina Worinyo gi thamoidadi achaakpa meida ghee heibagum thoklare.
Khaangbada khwaaidagi wabadi keina meichaak asini haibado ngasidi Worinyo gi tanouraba maithongda tariba mami asina taaklare.
‘Nungsibabu sanapotkum khanba laangon anigi saktam louduna mibu asuk thinna otpa ma nongmadi nangna langliba meisaa asimak laangba oishanu. Eta leiraang amada khoi amatana keidounungda ngangladabani, mangondagi henba sangsar asida nupa waatte, kaplaganu thamoi khara chaothok-u se.‘
Tabithaa na Worinyo bu themjinduna hairak-e.
Nungshibada warouba-asaoba-pendaba leite, phanamak oidunasu nungshiba mahakpudi Worinyona warouba ngamkhide, ahoinadum mamanabi singduna Lamngaanbada asaoba kaya phongdoklabasu mahaknadi mamanabigi waheisingdu khangba ngamjakhide -
‘Eta esinggi ekhou laangbabu atoppa mahi amatana mahut sinba yadabagum, eigi nungsibasu magi nungsi erik natanadi atoppa kanagi nungsibana mahut sinba yararoi. Eigi punsidi maagidamak katkhrabani, mana eibu thouoibidrabashu, eidi mapoksimagi oina maagi oikhrabani. Maana waana leiba ei yengba ngamloi, maagi punsidi nungai yaaiphana paankhiba oishanu, eigi punsidi mahaou yaodraba punsini.‘
Wahei sing asina Horeiphi amadi Tabithaa gi thamoibusu machek thokna kaikhibana, makhoi ahum konsinaduna tengthaari. Tanourabi thamoi ahumna chiklaba meechik-meeraokhol tadraba ahingsida hikna-hikna ningamdana tengthajabagi khonjel taibang kanana tabidrabasu ahinggi leiteng oiriba thaja-thawan singsu makhoi ahumgi matoudu yengba ngamdramalle, nongmadol thaja mahaksu leichil lakta lotkhre, makhol houna khakna laona tengthakhi nongmadol thaja mahaksu, sintharakhi nonggi mapei oina Thaja magi mitlu pirang saktuna…..
